اک عمر کاٹ دی ہے نظر نے شہود میں

اب نور چاہیے ہے مجھے اس وجود میں

جب تک ہے روح خلق و فنا کی قیود میں

رہنا پڑے گا ذات کو تب تک حدود میں

ہر سانس، پور، بال مرا قلب بن چکا

پورا وجود کانپ رہا ہے سجود میں

اک زاویہ جو قائمہ اٹھا ہے قلب سے

امکان دِکھ رہے ہیں مسلسل عمود میں

جو کل حروفِ راز تھے اعجاز بن گئے

کھُلنے لگے ہیں بھید جنوں کی نمود میں

احساس، سوچ، روح سبھی کام آ گئے

تبدیل ہو رہا ہے بدن بھی وقود میں

وہ لمحہِ حصولِ تمنا و جستجو

پایا ہے وہ جو پا نہیں سکتے خلود میں

آؤ عماد رب سے دعا، التجا کریں

کر لیجیے قبول ہمیں بھی جنود میں

رات ۵۵:۲

۳۱ مئی۳۲۰۲

گھرپر

وحی کا ایک دور تھا

وہ دور اپنے مقصدِ عظیم کو نبھا رہا تھا

اور اب یہ طور تھا

کہ شرک کی دبیز تہہ قلوب سے اتر چکی تھی

 فسق اور فجور کا جہاں پہ پہلے شور تھا

وہیں پہ اب صدائے حق، بنائے حق کا زور تھا

خدا کے آخری نبیﷺ

وحی کی اک طویل تر لڑی کی آخری کڑیﷺ

امین رازِ کن فکوں ﷺ، امیرِ تاجِ انبیاﷺ

رسولِ آخر الزماں ﷺ کے لب پہ تھی یہی دعا

کہ امتِ محمدی کی چھت سدا پڑی رہے

یہ قوم روز حشر تک ستون پر کھڑی رہے

رسول ﷺکی دعا کے پہلے حرف فرش سے چلے

اسی گھڑی

ملائکہ کے تاجدار جبرئیلِؑ پارسا

قوی، امین و با صفا

بھی کوئے عرش سے چلے

خدا کا حکم تھا کہ دینِ حق کا کل مقدمہ

ملائکہ کے تاجدار و تاجدارِ انبیاﷺ کے بیچ یوں بیان ہو

کہ حجتِ تمام ہو

کہ دین کو دوام ہو

کہ حشر تک سکینتِ قلوب کا سلیس انتظام ہو

ملائکہ کا تاجدار، تاجدارِ انبیا ﷺکے ساتھ ہم کلام ہو

مدینۃ النبی تھا اور مسجدِ رسول تھی

صحابہِ کرام کے جلو میں افضل البشرﷺ

زمیں پہ ایسی سادگی سے ہو رہے تھے جلوہ گر

جو شانِ انبیا ہی ہے

ملائکہ کے تاجدار ان کے سامنے گئے

زمیں، فلک، بشر سبھی کے سامنے اصولِ دیں کا مختصر بیاں ہوا

درست دین کیا ہے کچھ مکالموں میں

کھل کے یوں عیاں ہوا

کہ حشر تک سند رہے

ہر ایک دور میں اضافتوں کا باب رد رہے

سلامتی ہے جس کی ذات اس کا ہم پہ قرض ہے

رسولِ آسما ن اور رسولِ کائنات ﷺپر

سدا سلامتی کہیں کہ یہ ہمارا فرض ہے

سلام ہے رسولﷺ پر

سلام جبرئیلؑ پر

سلام آگہی، سلامتی کے اس قبیل پر

سلام دینِ حق کی اس سبیل اور دلیل پر

 رات ۱۱:۰۱

۹۱مارچ ۴۲۰۲

گھر پر

رفتگاں

چلتی کشتی کے ہچکولے

ہولے ہولے

جسم کے سنگ ہی من بھی ڈولے

من جو قرنوں سے ساکت ہو

دل جو کب سے بے حرکت ہو

سوچ جو صدیوں سے بے حس ہو

جذبے جن کا ذکر بھی مت ہو

سب کچھ اک دم، یک دم بولے

سانس کی ڈوری

آس کی ڈوری

من سے بندھی ہو

تو دل ہمت کر لیتا ہے

اپنے سے بھی لڑ لیتا ہے

ایک سفر پھر کر لیتا ہے

چلتی کشتی کے ہچکولے

جسم کے سنگ ہی من بھی ڈولے

با ہمت دل

 ہولے ہولے

دور کہیں ماضی میں جا کر

دل کے پرانے، صدیوں سے جامد در کھولے

صبح ۰۲:۰۱

۲ اگست ۲۲۰۲

استنبول سے کچھ باہر بحیرہِ مرمرہ میں ایک کشتی کے اندر

صبر کر گیا اک شخص

قلب بھر گیا اک شخص

سر کٹا کے کاندھے پر

بوجھ دھر گیا اک شخص

مجھ میں جی اٹھا اک درد

اور مر گیا اک شخص

شہر اب بھی تیرا ہے

کیا ہے گر گیا اک شخص

قبر میں نہیں اترا

اپنے گھر گیا اک شخص

روشنی تھا جیتے جی

رات کر گیا اک شخص

رمزِ حال سے واقف

با خبر گیا اک شخص

ان اداس راتوں میں

اب کدھر گیا اک شخص

کہہ رہے تھے پتھر ہے

لو بکھر گیا اک شخص

دل میں شمعِ غم لے کر

تا سَحَر گیا اک شخص

کر کے دن کے غم کی بات

رات بھر گیا اک شخص

کل عماد خوشیوں پر

درد دھر گیا اک شخص

رات ۶۴:۱

یکم ستمبر ۲۲۰۲

برمنگھم

مرے وجود میں بڑھنے لگا تھا ڈر چپ چاپ

میں خود کو حوصلہ دیتا رہا مگر چپ چاپ

ہوائے نفس بھی، شر کی گرج چمک بھی تھی

میں خود میں ڈھونڈ رہا تھا کوئی شجر چپ چاپ

کسی پہر میں دکھا دیں گے زخمِ دل بھی تمہیں

اداس رات گزرتی رہی اگر چپ چاپ

تمہاری یاد سے لڑتا رہا دلِ مضطر

تمہاری راہ کو تکتی رہی نظر چپ چاپ

کوئی فنا کا مسافر کوئی بقا کا سفیر

گزرنے دیتی ہے ہر شخص کو ڈگر چپ چاپ

ہمارے حال سے واقف نہیں ہیں واقفِ حال

ہوئی ہے رزم بپا ذات میں مگر چپ چاپ

تلاش اپنی تھی اور ڈھونڈنا بھی خود میں تھا

تبھی تو ذات کو کرنا پڑا سفر چپ چاپ

گرے ہیں نفس کی کھائی میں بھی اکیلے ہی

کیا ہے قلب کی چوٹی کو ہم نے سر چپ چاپ

کسی سے ذکر کیا ہے نہ دل دکھایا ہے

تلاشِ ذات میں چھانے ہیں بحر و بر چپ چاپ

درِ رسولﷺ پہ آواز پست رکھنی ہے

عماد حاضری دینی ہے سر بسر چپ چاپ

رات ۹۴:۸

۲ ستمبر ۲۲۰۲

برمنگھم

گزرتے لمحوں کی بے ثباتی کا ذکر تھا گرچہ ہر زباں پر

مگر حقیقت کی جستجو میں تھے چارچھ لوگ ہی وہاں پر

زمیں پہ انسان رہ رہے ہیں، کوئی فرشتہ نہیں ملے گا

یہ اپنے خوابوں کے جیسی بستی کہو بسا پاؤ گے کہاں پر

جو سود پر زندگی گزاری تو یوں سمجھئے حرام کر لی

سو ایسا سوچا ہے آگے تکیہ کریں گے ہم بھی کسی زیاں پر

ہماری رگ رگ کی، ریشے ریشے کی آبیاری غموں نے کی ہے

ملے گا ادراکِ رمزِ ہستی، میاں کریدو گے تم جہاں پر

گئے زمانوں میں خود سے کہتا تھا میں کہ تنہائی ہی میں سکھ ہے

کئی برس اور ہزار چہرے، میں اب بھی قائم ہوں اس بیاں پر

وہ میرے اندر کی آنکھ سے صاف دکھ رہا ہے ہر ایک لحظہ

نہیں کی تشکیلِ زندگی میں نے ایک سائے پہ اک گماں پر

عماد احمد اداس شب ہے تو اپنے اندر اتر کے دیکھو

شکستِ دل بھول جاؤ گے تم ملالِ ہستی بھی ہے یہاں پر

رات ۲۵:۲

۴۱ستمبر ۲۲۰۲

گھر پر

کہیں سے کھلنے لگا ہے عقدہ کہ لامکاں کا ظہور کیا ہے

بدن کو محسوس ہو رہا ہے کہ کیا مجسم ہے نور کیا ہے

اگرچہ قالب تو ہے مگر قلب اس کے اندر نہیں ہے اب تک

اگر تجلی نہیں پڑی تو پہاڑ ہے صرف، طور کیا ہے

مقامِ عقل و خرد سے آگے مقامِ تسلیمِ قلب و جاں ہے

وہاں پہ اک وجد میں ہے ہستی وہاں نہ پوچھو شعور کیا ہے

تو اس کا مطلب سبھی ریاضت مجھے ہی تیار کر رہی تھی

بدن کے اندر بدن کی لذت سے ماورا یہ سرور کیا ہے

زر و زمیں سے نہ قلب بدلا، نہ سوچ نکھری، نہ روح جاگی

عماد احمد ابھی کھلا ہے یہ سب متائے غرور کیا ہے

رات ۷۱:۴

۴۱ستمبر ۲۲۰۲

گھرپر

 زیاں اک سوچ ہے، احساس ہے یا تجربہ ہے یہ

کسی لمحے کا اک ادراک ہے یا سلسلہ ہے یہ

ترے اندر جو اتنی تشنگی ہے کیوں ہے آخر وہ

مرے اندر مسلسل بڑھ رہا کیسا خلا ہے یہ

بھلا کیسی خلش، کیسی اداسی دل میں اتری ہے

بھلا کیسا جنوں میری رگوں میں بہہ رہا ہے یہ

یہاں تک آتے آتے مڑ گئے ہیں بوالہوس سارے

جسے منزل سمجھتے تھے حقیقی راستہ ہے یہ

مرا ہمزاد بھی خاموش میرے پاس بیٹھا ہے

اسے کیا غم ہے میری بات کیسے سن رہا ہے یہ

اگر خود کو ہرا کر لوٹ آیا تو میں بچ آیا

اگر میں بچ گیا خود سے تو سمجھیں حادثہ ہے یہ

میں اپنی سوچ سے کترا کے جذبوں کی طرف چل دوں

تو میرا ذہن کہہ دیتا ہے، کتنا بے وفا ہے یہ

عماد احمد حوادث کا بیاں سنتا ہوں میں جب بھی

مجھے لگتا ہے میری ذات کا ہی واقعہ ہے یہ

صبح۱۴:۵

۷۱ ستمبر۲۲۰۲

گھرپر

میں ہی شر ہوں، میں ہی خیر ہوں، میں ہی ہوں میدانِ جنگ

خود سے لڑنے نکلا ہوں اور میں ہی چلوں گا اپنے سنگ

میں مظلوم ہوں، میں ہی ظالم، میں ہی ہوں پوری تاریخ

میں ہی کالا، میں ہی گورا میں ہی ہر تہذیب کا رنگ

میں انسانی سانچے میں ہوں، میں انسانی ڈھانچے میں

نور ہوں لیکن مٹی سے تشکیل ہوا ہے اک اک انگ

میں نے ہی اذکار سے اپنے قلب میں سات جہان بھرے

میں نے ہی کالے اعمال سے کیا ہے اپنا سینہ تنگ

میں نے ہی مخلوق میں اشرف ہونے کا اعزاز لیا

میں ہی اپنی ذات کے اندر ہو جاتا ہوں باعثِ ننگ

اعلیٰ، ادنیٰ، اونچا، نیچا، سادہ اور پیچیدہ سب

کس مخلوق میں مل سکتے ہیں ایسے لچھن ایسے ڈھنگ

اپنا آپ کریدو گے تو یہ سارے رنگ پاؤ گے

آؤ عماد احمد تم خود کو دیکھو اور ہو جاؤ دنگ

صبح ۷۱:۶

۷۱ستمبر۲۲۰۲

گھرپر

چھوڑ دیں قلب کی اور نفس کی گردان جناب

اب رہیں ایسے کہ سمجھیں سبھی انجان جناب

میرے مٹ جانے سے کتنوں کا بھلا ہوتا ہے

آ گئی آپ کے ہونٹوں پہ بھی مسکان جناب

کہہ دیا آپ نے سب، یعنی بچایا ہی نہیں

کچھ تعلق کو بچانے کا بھی امکان جناب

گئے دن نت نئے الزام سجا دیتے ہیں

کیجئے آج نہیں مجھ پہ یہ احسان جناب

چھوڑ دیں آپ ندامت کا نہیں ذکر کریں

شرمساری کو سمجھئے مری پہچان جناب

ختم ہی کرنا ہے رشتہ تو مروت کیسی

اب عماد آئے تو کر ڈالیں پریشان جناب

رات گئے

۶۲ ستمبر ۲۲۰۲

گھرپر

سکوتِ ہست

کیسے دن ہیں

کچھ کہنے کی خواہش بھی ہے

اور چپ بھی رہنا چاہتا ہوں

شاید کچھ کہنے کی خواہش میں ہی چپ رہنا چاہتا ہوں

حرفوں لفظوں سے ہٹ کر

خاموشی کے نازک تاروں سے

یا سانسوں کے زیر و بم سے

یا نبض کی دھیمی جنبش سے

ان ہونے جذبوں کی بابت کچھ باتیں کہنا چاہتا ہوں

انفس کی گہرائی میں گم کچھ راز سمجھنا چاہتا ہوں

آفاق کے پردوں کے پیچھے کچھ بھید پرکھنا چاہتا ہوں

ان ہونے، ان دیکھے سفروں کی بابت لکھنا چاہتا ہوں

لیکن اس سے پہلے ان کو احساس میں جینا چاہتا ہوں

ادراک میں جینا چاہتا ہوں

جس لطف و کرم کی حدت کو محسوس کیا ہے اب اس کو

میں روح تو کیا اس جسم میں بھی شدت سے سہنا چاہتا ہوں

دنیا کے گورکھ دھندے سے تھوڑا ہٹ کر

تھوڑا کٹ کر

اب اپنی ذات کے ساغر میں

اپنے اندر اٹھتی من کی موجوں میں بہنا چاہتا ہوں

اب جو کچھ کہنا چاہتا ہوں

اس کے بارے میں سچ یہ ہے

میں چپ بھی رہنا چاہتا ہوں

ادراک

سینے میں بائیں جانب اک ٹیس اٹھی ہے

ہلکی سی، مبہم سی، بے انداز سی جس نے

شاید دل کو تو تکلیف نہیں دی لیکن

سوچ میں گویا اک طوفان اٹھا ڈالا ہے

اک دن یوں ہی

شاید آج ہی، شاید سالوں بعد کسی دن

ایسے ہی اک ٹیس اٹھے گی

لیکن وہ لمحے دو لمحے میں ٹلنے والی کب ہو گی

شاید وہ سینے سے اٹھے گی

تو دل کی گہرائی میں ہی جا اترے گی

ذات کے گہرے ساگر میں طوفان اٹھے گا

سوچ کسی ساعت کو جلے گی اور پھر یک دم بجھ جائے گی

سانس کوئی لمحے کو چلے گی اور پھریک دم رک جائے گی

جسم اگر تڑپا بھی تو بس

کچھ ساعت کو تڑپے گا پھر جم جائے گا

عمر کی گاڑی اندھے موڑ پہ رک جائے گی

اور پہیہ تھم جائے گا

سینے میں بائیں جانب جو ٹیس اٹھی ہے

اس نے عمر کے گزرے سالوں اور آتے برسوں کو چھوا ہے

دل کو یہ احساس ہوا ہے

آج چلیں یا کچھ دن رک لیں

آخر تو جانا ٹھہرا ہے

اڑنا چاہیں یا پھر جھک لیں

آخر ایک گڑھا گہرا ہے

سینے میں بائیں جانب جو ٹیس اٹھی ہے

اس نے یہ ادراک دیا ہے

اک لمحے میں، اک لحظے میں

سارا منظر ہٹ سکتا ہے

عمر کا رستہ پٹ سکتا ہے

شاید آج ہی

شاید سالوں بعد کسی دن

لیکن تب تک مہلت ہے، کچھ لمحوں کی یا کچھ سالوں کی

جس میں سب ضائع کرنا ہے یا پھر کچھ حاصل کرنا ہے

جسم گنوا کر چل دینا ہے یا پھر روح کی پیاس کی خاطر

قلب کا مشکیزہ بھرنا ہے

مشکل اور لمبے رستوں پر زادِ سفر پورا رکھنا ہے

رات ۲۲:۲

۲۲نومبر۲۲۰۲

گھرپر

ذات اور رات کی حقیقت جان

ان کہی بات کی حقیقت جان

اپنے اندر چھپے شمر کو دیکھ

نفس پر گھات کی حقیقت جان

پہلے کچھ دیر آگ دے اس کو

پھر کسی دھات کی حقیقت جان

کامیابی کا جب نشہ اترے

تو مری مات کی حقیقت جان

پہلے ماخذ تلاش اپنا عماد

بعد میں ذات کی حقیقت جان

نفس اور قلب

مقصدِ زندگی کی راہوں پر

میں بھٹکتا رہا ہوں سال ہا سال

خود سے لڑتا رہا ہوں سال ہا سال

کوئی رستہ نہ سنگِ میل ملا

نہ مری ذات کو قبیل ملا

بے امیدی رچی رہی اندر

بے نشانی بسی رہی باہر

اور لڑتا رہا میں اپنے سے

ذات کے آب دار سپنے سے

ایسے لمحات مجھ پہ گزرے ہیں

جن میں ادراکِ درد بڑھتا تھا

میرے اندر کا دکھ کسک کے ساتھ

قلب سے اک سوال کرتا تھا

نفس تو معصیت سکھاتا ہے

راستہ بھول بھال جاتا ہے

پر تجھے نور تک رسائی تھی

تو نے اونچی اڑان پائی تھی

تیرا رستہ محال کیوں ٹھہرا

تو نے منزل کو کیوں نہیں پایا

اور مرا قلب کچھ نہ کہہ پاتا

کوئی اسباب بھی نہ بتلاتا

اک مسلسل سکوت، سناٹا

اس کے اطراف پھیلتا، چھاتا

اور ایسے میں نفس خود کہتا

قلب اور روح کا جو رشتہ ہے

نفسِ انسان ہی سے جڑتا ہے

نفس کا طہر چاہیے پہلے

ورنہ اندر کے غم نہ جاگیں گے

اپنی ہستی کے در کھلیں گے نہیں

اور قلب و نظر دھلیں گے نہیں

قلب اور نفس ساتھ دیں گر تو

راستہ راستی سے ملتا ہے

راستی راستے سے ملتی ہے

روح سرشار ہو تو جسم کو بھی

تشنگی فاصلے سے ملتی ہے

مقصدِ زندگی کی راہوں پر

کوئی پل بھی نہیں بھٹکتا قلب

خود سے ہرگز نہیں بدکتا قلب

راستے سنگِ میل بنتے ہیں

چلتے چلتے قبیل بنتے ہیں

بے امیدی کہیں نہیں رہتی

بے نشانی کہیں نہیں بستی

مقصدِ زندگی کی راہوں پر

مقصدِ زندگی کی راہوں پر

ذات کا منظر

ابھی یہ چند ساعتوں کی بات ہے کہ ہر طرف

دبیز سردیوں کی دھوپ خوشنما دکھائی دی

ابھی تو گھر کے صحن میں درخت اپنے پیر پر سکون سے کھڑے ملے

ہوا بھی نرم نرم تھی

فضا بھی گرم گرم تھی

پرند اپنے پر ہوا کے دوش پر لئے ہوئے

فضا کی وسعتوں سے آسمان کی طرف اڑے

کسی نظر نے آنکھ بھر کے دیکھ ہی لیا اگر

تو آسماں کی وسعتوں کا رعب دل پہ پڑ گیا

ابھی یہ چند ساعتوں کی بات ہے مگر یہ اب

ہوا کو کیا ہوا ہے اتنی تیز کیوں چلی ہے یہ

فضا کو کیا ہوا ہے اس میں اتنی گرد کیوں ہے اب

نظر اٹھائی ہے تو آسمان دکھ نہیں سکا

نظر جھکائی ہے تو یہ زمین سرخ رو ہے اب

نہیں سمجھ میں آ رہا کہ کس طرف ہے کون،کب

ہوا کی تیز لہرسے درخت ٹوٹتے ہوئے

پرند تیز و تند آندھیوں میں کانپتے ہوئے

چرند اپنے راستوں کے بیچ ڈولتے ہوئے

فضائے گرد و بار میں یہ شام ڈوبتے ہوئے

ابھی یہ چند ساعتوں کی بات ہے یہ کیا ہوا

فضا تو نرم گام تھی

 ہوا تو ہم خرام تھی

یہ جو ہوا ہے اس جگہ کا یہ مزاج تو نہ تھا

ہواؤں پر، فضاؤں پربلا کا راج تو نہ تھا

یہ خارجی ہوائیں تھیں

یہ خارجی بلائیں تھیں

جو اس جگہ کے حسن اور مزاج میں گھلی نہ تھیں

جو اس حسین شام سے کبھی کہیں ملی نہ تھیں

عماد تیری ذات میں بھی ایک ایسی شام ہے

دبیز سردیوں کی دھوپ خوشنما ہے جس جگہ

جہاں پہ گھر کے صحن میں درخت اپنے پیر پر

 سکون سے ہیں رات دن

 ہوا بھی نرم نرم ہے

فضا بھی گرم گرم ہے

ترے خیال کے پرند اپنے پر ہوا کے دوش پر لئے ہیں اس جگہ

ترے مزاج کی فضا سے آسمان کی طرف

 نظر اٹھا کہ دیکھ لو

تو آسماں کی وسعتوں کا رعب دل پہ آ پڑے

عماد تیری ذات میں بھی

 شام آج اپنا رنگ و روپ یوں

بدل رہی ہے ایک دم

ہوا کو کیا ہوا ہے اتنی تیز کیوں چلی ہے یہ

فضا کو کیا ہوا ہے اس میں اتنی گرد کیوں ہے اب

نظر اٹھائی ہے تو آسمان دکھ نہیں سکا

نظر جھکائی ہے تو یہ زمین سرخ رو ہے اب

نہیں سمجھ میں آ رہا کہ کس طرف ہے کون، کب

ہوا کی تیز لہر سے ترے گھنے وجود میں درخت ٹوٹتے ہوئے

خیال کے پرند تیز و تند آندھیوں میں تیرے دل میں کانپتے ہوئے

سکون کے چرند جیسے تیری ذات کے مہیب را ستوں کے بیچ ڈولتے ہوئے

فضائے گرد و بارِ زندگی میں آج شام ڈوبتے ہوئے

یہ جو ہوا ہے تیری ذات کا مزاج تو نہ تھا

ترے وجود پر کسی بلا کا راج تو نہ تھا

یہ خارجی خیال تھے، یہ خارجی وبال تھے

جو تیری ذات کے مزاج میں کبھی گھلے نہ تھے

جو تیرے قلب و جان سے کبھی کہیں ملے نہ تھے

شام ۸۳:۴

۷۲ نومبر۲۲۰۲

گھر کے باغ میں، لاہور

فنا اور بقا

مولا میرا اندر مار کے زندہ کر دے

میرے قلب کو اک آزاد پرندہ کر دے

خواہش، خواب، تمنا، آس، امید، ارادے

ماضی، حال اور مستقبل کے کچے دھاگے

دکھ سے بچنے کی، سکھ پا لینے کی خواہش

خوابوں جیسی زیست سجا لینے کی خواہش

من کو جو بھی بھا جائے اس شے کی تمنا

آس امید کی ڈور بندھے اڑنے کی تمنا

نفس کی موجوں میں بہتے کمزور ارادے

بہہ جاتا ہوں خود پر اپنی ذات کو لادے

دل کے اندر کتنے ہی سپنے زندہ ہیں

کچھ دنیا والے اور کچھ اپنے زندہ ہیں

سب زندہ ہیں مجھ میں، میں کیوں مردہ ہوں پھر

من میلے میں کیوں اتنا افسردہ ہوں پھر

خواہش، خواب، تمنا، آس، امید، ارادے

ماضی، حال اور مستقبل کے کچے دھاگے

خواہش، خواب، تمنا بس دنیا داری کی

ہر اک آس، امید ہے بس نفسا نفسی کی

جو بھی ارادہ باندھا اس کا حاصل میں تھا

جتنا پاس کیا اتنا ہی فاصل میں تھا

ماضی، حال اور مستقبل اک بہتا دریا

وقت کے اس دریا میں اک اک لمحہ ڈوبا

فانی دنیا، فانی جذبے، فانی سوچیں

یعنی لا یعنی جذبے لا یعنی سوچیں

ہر رستے سے پُر ہے خود بے رستہ ہے دل

ہر شے زندہ ہے اس میں خود مردہ ہے دل

مولا میرا اندر مار کے زندہ کر دے

میرے قلب کو اک آزاد پرندہ کر دے

دوپہر۵۲:۱

یکم دسمبر ۲۲۰۲

سودا سلف لانے کی لئے بازار جاتے ہوئے

خوش نہیں ہوں مطمئن ہوں جو ضروری بات ہے

بات اتنی ہی کروں گا اور یہ پوری بات ہے

ذات کی گہرائی میں مدفون رازوں کا سراغ

لا شعوری میں بتا دینا شعوری بات ہے

ہجر کا اور ہجرتوں کا سلسلہ رکتا نہیں

وصل تک کی داستاں کتنی ادھوری بات ہے

قلب قرنوں کا سفر لمحوں میں کر لیتا ہے طے

چھوڑیے جوہر پرستوں کو یہ نوری بات ہے

آج پھر آنگن میں سارا گھر اکٹھا ہے مگر

بات تھی کل قربتوں کی، آج دوری بات ہے

تیرے اندر کی خشیت کچھ نہیں اب تک عماد

خلوت و جلوت میں اک جیسی حضوری بات ہے

صبح ۰۳:۶

۰۱دسمبر ۲۲۰۲

گھر،پر

قیدی

نفسِ امارہ کا قیدی یہ سمجھتا ہے کہ وہ

قادرِ مطلق ہے اپنی ذات کا مختار ہے

اس کے جذبوں کی امنگوں سے عبارت ہے حیات

اس کی اپنی سوچ گویا زیست کا معیار ہے

اس کے جسم و جان سے روشن ہیں ساری منزلیں

اس کے ہاتھوں میں جہاں کا سارا کاروبار ہے

اس کو لگتا ہے کہ وہ آزاد ہے ہر عیب سے

اس کی خاطر آ رہی ہے ہر مدد بھی غیب سے

وہ بنا سکتا ہے اپنے قاعدے قانون بھی

ٹھیک ہے اس کے لئے رسمِ کہن کا خون بھی

وہ بدل سکتا ہے ترتیبِ نزولِ خیر و شر

اس کی خواہش پر چلائے جائیں گے سب بحر و بر

نفسِ امارہ کا قیدی ذات کے زندان میں

اپنے اندر پھیلتی اک رات کے زندان میں

قلب کے ماخذ سے کٹ کر روح سے بھی بے خبر

وسوسوں اور واہموں کی ایسے ہوتا ہے نظر

سال ہا سال آپ اپنی موج میں بہتے ہوئے

ڈوبتا جاتا ہے خود کو دیرپا کہتے ہوئے

شام۵۵:۵

۰۱ دسمبر ۲۲۰۲

گھرپر

ڈھلان

مرے قلب پر زنگ لگنے لگا ہے

یہ سینہ مجھے تنگ لگنے لگا ہے

بہت سال ایسی ریاضت میں کاٹے

کہ طہرِ نظر کی حفاظت میں کاٹے

میں قلب و بدن کو سنبھالے پھرا ہوں

خیال اور ظن کو سنبھالے پھرا ہوں

بچا کر چلا ہوں میں جذبوں کو شر سے

اٹھا کر چلا ہوں میں سوچوں کو ڈر سے

سدا نفس اپنی نگاہوں میں رکھا

سدا قلب اپنی دعاؤں میں رکھا

مگر وقت نے حادثہ کر دیا ہے

مجھے راستے میں فنا کر دیا ہے

نظر نے، سماعت نے، قلب و بدن نے

شرِ سوچ و جذبات، امید و ظن نے

کسی نے کہیں کچھ شرارت تو کی ہے

کسی واسطے تو نجابت رکی ہے

کسی امر سے قلب خالی ہوا ہے

مری روح کا درد والی ہوا ہے

خلا، میرے اندر خلا بڑھ رہا ہے

مجھے ذات سے کچھ گلہ بڑھ رہا ہے

کہیں میری برسوں کی ساری ریاضت

کہیں سال ہا سال کی یہ حفاظت

میں لمحوں کے اندر لٹا کر نہ رکھ دوں

میں اپنی نجابت گرا کر نہ رکھ دوں

نگاہوں سے میں نفس اوجھل نہ کر دوں

دعاؤں کے بن قلب بوجھل نہ کر دوں

مرے قلب کا زنگ اترے گا کیسے

یہ سینہ کھلے اور پھیلے گا کیسے

میں کیسے جیوں طہر و پاکیزگی سے

میں کیسے مروں طہر و پاکیزگی سے

مرے قلب کو راستہ چاہیے ہے

مجھے نور کا سلسلہ چاہیے ہے

مرا قلب ہے رب کی دو انگلیوں میں

دعا ہے پلٹ دے اسے ساعتوں میں

رات ۲۲:۱

۲۱ دسمبر۲۲۰۲

گھرپر

رات کے اندھیرے میں گر ایک بھی ستارہ ہوتا شرحِ صدر ہو جاتی

بات کھل نہیں سکتی تو کوئی استعارہ ہوتا شرحِ صدر ہو جاتی

نفس کی عداوت کیا ہے، قلب کی ریاضت کیا ہے، ذات کا سمندر کیا

ہم نے بھی اگر یہ مشکل راستہ گزارا ہوتا شرحِ صدر ہو جاتی

وقت تیرے ہاتھوں نے جو نفس کو فنا کر ڈالا اس سے خوش نہیں ہوں میں

بات تب بنی ہوتی گر میں نے اس کو مارا ہوتا شرحِ صدر ہو جاتی

راستہ بنانے والا، راستہ دکھانے والا، منزلوں کا مالک ہے

کاش ہم نے اس مالک کو قلب سے پکارا ہوتا شرحِ صدر ہو جاتی

بوجھ کم نہیں ہوتا ہے، درد تھم نہیں پاتا ہے، زخم بھر نہیں پاتا

کاش اپنی آنکھوں میں بھی اشک کا ستارہ ہوتا شرحِ صدر ہو جاتی

کن سمندروں کے اندر کیسی کیسی سیپی ڈھونڈی، ہاتھ کچھ نہیں آیا

گر عماد احمد تو نے پا لیا کنارہ ہوتا، شرحِ صدر ہو جاتی

دوپہر ۵۲:۲

۲۱ دسمبر۲۲۰۲

ٹرفلزکیفے میں، لاہور

رزم

مکالمہ یہ نہیں

کہ دنیا غلط ہے اور میں درست تر ہوں

معاملہ بلکہ اس طرح ہے

کہ اب شعوری ثبوت ہیں جو

ہر ایک جانب سے میرے قلب و نظر پہ یلغار کر رہے ہیں

مجھے کسی اور سمت چلنے پہ جیسے تیار کر رہے ہیں

مجھے حقیقت کو اک نئے زاویے سے دکھلا کے

سخت اصرار کر رہے ہیں

کہ صرف اپنی نظر سے دیکھو

معاشرے کو، نظام کو، ضابطوں کو پرکھو

سماج کیسے بُنا ہوا ہے

معاش کیسے بَنا ہوا ہے

یہ ربط کیسے کھڑا ہوا ہے

تم اس کی گہرائیوں کو پرکھو

تم اس کی رعنائیوں کو سمجھو

پھر اس کی تنہائیوں کو جانو

اور اس کی ویرانیوں کو دیکھو

سوال ہرگز بھی یہ نہیں ہے

کہ میں شعوری جگہ پہ دنیا سے مختلف ہوں

یا میرے جذبات اور سے ہیں

مگر اگر ساری زندگی جس سماج کو، جس معاش کو

اور نظام کو دی ہے وہ مجھے اجنبی لگا ہے

تو اس کے پیچھے کہیں کوئی اور معاملہ ہے

بہت دنوں تک

میں اپنے اندر اور اپنے باہر کو دیکھتا، سوچتا، پرکھتا رہا ہوں تو

بات کھل رہی ہے

مرے پہ پہلے پہل تو اپنی ہی ذات کی رات کھل رہی ہے

جو میرے اندر سیاہ راتوں کا سلسلہ تھا

وہاں شفق پھوٹنے لگی ہے

اور اس کے روشن وجود سے رات دھل رہی ہے

جو میرے اندر سے ایسی تاریک رات ڈھلنے لگی ہے تواس معاشرے کی، معاش کی اور نظام کی بھی تمام اوقات کھل رہی ہے

ابھی کھلا ہے کہ جسم و جاں میں اگر کوئی باس بھر چکی ہو

تو پھر سماجی ہو یا معاشی

کسی طرح کے نظام کی باس کون محسوس کر سکا ہے

ابھی دکھا ہے کہ اپنے اندر کی آنکھ موندے ہوئے پڑے ہوں

تو کون باہر کا کرب دیکھے گا اور کس کے

لطیف جذبوں پہ بوجھ ہو گا

ابھی یہ سمجھا ہے میرے اندر نظامِ انصاف مر چکا تھا

تو میں نے آخر معاش میں اور سماج میں کیا نظامِ انصاف چاہنا تھا

سفر کا آغاز کون باہر سے کر سکا ہے جو میں کروں گا

اگر میں انصاف پر جیوں گا

تو پہلے اندر کے نظمِ باہم کو ربط دوں گا

دل و جگر کو

بدن، نظر کو

تمام سوچوں، دبیز جذبوں

اداس لمحوں، کمال سالوں

سفر کے رستوں کو، منزلوں کو

میں ضبط دوں گا

میں پہلے ہستی کے زاویوں کو شعور دوں گا

کلام دوں گا

میں اپنے ہونے کو منصفی کا مقام دوں گا

مکالمہ یہ نہیں

کہ دنیا غلط ہے اور میں درست تر ہوں

سوال ہرگز بھی یہ نہیں ہے

کہ میں شعوری جگہ پہ دنیا سے مختلف ہوں

یا میرے جذبات اور سے ہیں

معاملہ بلکہ اس طرح ہے کہ اب شعوری نشانیوں سے

دماغ و دل کی فصاحتوں سے

نظر کی پوری وضاحتوں سے

ثبوت پائے ہیں جو کہ یلغار کر رہے ہیں

مجھے یہ تیار کر رہے ہیں

کہ صرف اپنی نظر سے دیکھو

معاشرے کو، نظام کو، ضابطوں کو پرکھو

سماج کیسے بُنا ہوا ہے

معاش کیسے بَنا ہوا ہے

یہ ربط کیسے کھڑا ہوا ہے

 تم اس کی گہرائیوں کو پرکھو

تم اس کی رعنائیوں کو سمجھو

تم اس کی تنہائیوں کو جانو

اور اس کی ویرانیوں کو دیکھو 

جو اپنے اندر بپا کیا ہے

وہ انقلاب آج اپنے باہر بھی لا کے دیکھو

نظامِ ہستی نظامِ دنیا سے مختلف ہے تو آؤ جیسے

تم اپنے اندر سے بھڑ گئے تھے اسی طرح سے

معاشیاتی، سماجیاتی نظام دنیا سے اپنی سوچیں لڑا کے دیکھو

یا اس کو بدلو یا اپنی ہستی گنوا کے دیکھو

دوپہر۵۰:۱

۴۱ دسمبر ۲۲۰۲

گھر کے صحن میں

 تکبر کس کو کہتے ہیں، تدبر کس کو کہتے ہیں

پڑھا جب خود کو تو جانا تحیر کس کو کہتے ہیں

تکاثر اور تفاخر سے تمسخر پھر تشکر تک

گئے سالوں نے سمجھایا تغیر کس کو کہتے ہیں

نہیں دیکھا اسے لیکن نگاہوں میں بسا ہے وہ

محبت کس کو کہتے ہیں، تصور کس کو کہتے ہیں

ملے ہوتے اگر کچھ سال پہلے تم ہمارے سے

تمہیں معلوم ہو جاتا تحجر کس کو کہتے ہیں

بدن اور روح کا رشتہ نبھاتے عمر کاٹی ہو

تبھی ادراک ہوتا ہے تناظر کس کو کہتے ہیں

تسلسل سے کسی لمحے کو سالوں تک جئیں پہلے

پھر اس کے بعد سمجھائیں تواتر کس کو کہتے ہیں

تو اپنے قلب کا اور نفس کا قضیہ سمجھتا ہے

تجھے معلوم ہے خود سے تنافر کس کو کہتے ہیں

بدن سے ماورا جذبے، جہاں سے ماورا سوچیں

عماد احمد بتاؤ پھر تحور کس کو کہتے ہیں

صبح ۹۵:۷

۴۲ دسمبر ۲۲۰۲

گھرپر

سمجھے گا میرے بعد تری کج روی کو کون

جانے گا تیرے بعد مری تشنگی کو کون

پہنچے گا شامِ غم تری آوارگی کو کون

حاصل کرے گا کرب کی وارفتگی کو کون

خوشیاں ملی ہیں راہ میں یکدم ہزار بار

پہنچی ہے پھر بھی درد کی برجستگی کو کون

مرگِ جنونِ عشق میں بولا یہ آئینہ

دھتکارتا رہا ہے اسی زندگی کو کون

قربِ غریبِ دل میں شبِ درد کاٹ کر

اب ڈھونڈنے چلا ہے غمِ آگہی کو کون

چل دشمنوں کی صف میں اتر کر تلاش کر

پہچاننے لگا ہے تری دوستی کو کون

دو چار لوگ خود میں اترنے چلے تو ہیں

اس راستے پہ پائے گا اب راستی کو کون

ماہِ تمام تُو تو ہے آنکھیں نہیں ہیں آج

دیکھے گا اب کی بار تری چاندنی کو کون

اے درد کس نے آپ سے آنکھیں چرائی ہیں

سہتا رہا ہے آپ کی پہلو تہی کو کون

تم رک کے اپنے آپ سے پوچھو کبھی عماد

سمجھا تمہارے قلب کی افسردگی کو کون

 رات ۲۵:۲

۵۲جنوری ۳۲۰۲

گھر پر

شہاب تھا، سحاب تھا مجھے پتا نہیں چلا

خیال تھا کہ خواب تھا مجھے پتا نہیں چلا

میں اس کی آنکھ میں اتر کے دور تک چلا گیا

وہ دشت تھا کہ آب تھا مجھے پتا نہیں چلا

جسے سوال در سوال میں کریدتا رہا

وہی مرا جواب تھا مجھے پتا نہیں چلا

میں اس کی خار دار ٹہنیوں سے خار کھا گیا

وہ شخص تو گلاب تھا مجھے پتا نہیں چلا

خرد کے سارے سلسلوں کا منزلوں پہ ٹوٹنا

جنون کا حساب تھا مجھے پتا نہیں چلا

میں ایک عمر اپنی معصیت پہ اشک بار تھا

یہی عمل مجاب تھا مجھے پتا نہیں چلا

جو راستوں کے بھید تھے انہیں سمجھ گیا تھا میں

جو ذات کا سراب تھا مجھے پتا نہیں چلا

میں تیرگی کے راستوں پہ نور ڈھونڈتا رہا

جو قلب کا نصاب تھا مجھے پتا نہیں چلا

میں سوچتا رہا ردائے نور کیسے چاک ہو

نظر میں جو حجاب تھا مجھے پتا نہیں چلا

میں اپنی ذات کے عذاب اس میں بو کے اٹھ گیا

عماد تو تراب تھا مجھے پتا نہیں چلا

صبح۵۳:۴

۶۲ جنوری ۳۲۰۲

گھرپر

 چھوڑ، غزل مت لکھ تو آج

درد کے پل مت لکھ تو آج

وقت کو خود چل لینے دے

اپنا کل مت لکھ تو آج

نام دے میرے باطن کو

پر دلدل مت لکھ تو آج

آنکھ برس کے خشک ہوئی

اب بادل مت لکھ تو آج

کچھ بھی کہہ لے دنیا کو

بس چنچل مت لکھ تو آج

ٹوٹ چکے ہیں جسم و جان

کچھ ہلچل مت لکھ تو آج

درد کی اس چادر کو عماد

پھر آنچل مت لکھ تو آج

صبح۲۵:۴

۶۲ جنوری ۳۲۰۲

گھرپر

 زخم کھولو گے، چلو کھولو پھر

کھل کے رو لو گے، چلو رو لو پھر

یہ ہنر کس نے سکھایا ہے تمہیں

بات پہلے کرو اور تولو پھر

نرم گفتار میں کڑوی باتیں

آؤ کانوں میں شہد گھولو پھر

زخمِ دل ٹھیک سے بھرنے ہیں تو

اپنے ماضی کی گرہ کھولو پھر

نفس کی چھینٹیں ہیں اب تک اس پر

دامنِ قلب کبھی دھو لو پھر

جس کا ہونا تھا وہ حاصل نہ ہوا

جو ملا اس کے ہی بس ہو لو پھر

رات بھر جاگتے رہتے ہو عماد

دو گھڑی کے لئے اب سو لو پھر

شام۵۱:۷

۳۲ جنوری۳۲۰۲

گھرپر

ترے خیال سے پیدا ہوئے بہت سے سوال

ہر اک سوال سے اٹھتے رہے ہزار خیال

روایتِ غمِ ہستی بنی دلیلِ نجات

حدیثِ دل کو بنایا بنائے استدلال

شبیہِ درد کی تکمیل ہوتے دیکھی ہے

وجودِ آرزو دیکھا ہے چشمِ دل نے نڈھال

مرے غرور کا لاشہ نشانِ عبرت ہے

میں اپنی ذات کے اندر غریقِ حزن و ملال

یہ ایک جان جو دینے کا تم سے وعدہ تھا

بندھا ہوا ہے اسی قرض میں مرا ہر بال

ابھی تو وعدہِ فردا نبھا رہا ہے بدن

سنائیں گے کبھی برزخ میں بیٹھ کر احوال

مری نسوں نے مجھے رسیوں سا باندھ دیا

مرے وجود کے ریشوں سے بُن گیا اک جال

ذرا ٹھہر کے مری بات سن مسافرِ ذات

بدن شکستہ بھی ہو تب بھی روح و دل کو سنبھال

کوئی گناہ کیا ہو کہ پھر قیام اللیل

خدا ہی جانتا ہے سب کے رات کے اعمال

عماد آج ذرا دیر کے لیے ٹھہرو

سناؤ درد کی تحریک کے کوئی اقوال

صبح۵۳:۸

۶۲ جنوری۳۲۰۲

گھرپر

 قطعہ

نیند میں سوچنے کی عادت ہے

خواب میں جاگنے کی عادت ہے

دن کے پہلو سے درد چن چن کر

رات بھر جھیلنے کی عادت ہے

دوپہر۰۳:۲۱

۰۳ جنوری۳۲۰۲

گھرپر

 جس کا غم ہوا ہے اتنا، بات تو وہ ذاتی ہے

لیکن اس سے اٹھنے والا درد کائناتی ہے

انتظامِ ہستی میں اک عمر کاٹ کر جانا

انتشار استقلالی، نظم حادثاتی ہے

دشت کی مسافت میں اک خواب دیکھ بیٹھا ہوں

دن میں تشنگی تو شب میں آرزو جگاتی ہے

جسم سے جڑا ہوں جب تک اڑ نہیں سکوں گا میں

چاہ نور کے ماخذ کی، خوف نامیاتی ہے

جانے کتنے سالوں سے یہ کھیل گھر میں جاری ہے

میں تھکن سے گر جاتا ہوں رات مسکراتی ہے

جو ہوا رخ و عارض سے ہم کنار رہتی تھی

اب مری لحد پر آ کر گرد کو اڑاتی ہے

ذات کے نہاں پردوں کو چاک کر کے دیکھا ہے

رات تو سمٹ جاتی ہے بات پھیل جاتی ہے

آرزو سے استقرا کر، جستجو سے استنباط

اے زمین زادے تیری روح کائناتی ہے

رمز جس بھی پل کھل جائے قلب جب بھی بھر جائے

بات جب سمجھ آتی ہے ذات سرسراتی ہے

آج بھی عماد احمد کی رات کتنی رنگیں ہے

آج بھی اداسی اس سے کھیلنے کو آتی ہے

صبحِ صادق۶۳:۴

۷ فروری۳۲۰۲

گھرپر

 یا غمِ زندگی کو رو جاؤ

یا شبِ آگہی میں کھو جاؤ

میں نے کھولا ہے دل تمہارے لئے

تم اداسی کا بیج بو جاؤ

ابھی بیٹھوں گا میں یہیں کچھ دیر

تمہیں جانا پڑے گا سو جاؤ

دل جلو آبِ بے خودی کے ساتھ

زخمِ آوارگی کو دھو جاؤ

رات اب آخری دموں پر ہے

کچھ گھڑی کے لئے تو سو جاؤ

اتنی جلدی بھی کیا ہے مرنے کی

اور کچھ ساعتوں کو ڈھو جاؤ

نفس کو نفس سے بچاؤ عماد

جاؤ اپنے رقیب ہو جاؤ

دوپہر۵۳:۱۱

۴۱ فروری ۳۲۰۲

گھرپر

تنہائی میں میلہ تھا اور میلے میں تنہائی تھی

رسوائی میں عزت تھی اور عزت میں رسوائی تھی

خود کو زندہ جان کے اپنا جسم لئے پھرتے تھے لوگ

کسی نے کاندھے پر مرضی سے لاش نہیں اٹھوائی تھی

آس بھروسہ رکھنا ہو تو اپنی ذات پہ رکھتے ہیں

دشمن نے کیا سمجھانی تھی دوست نے جو سمجھائی تھی

غربت اور فقر کے اندر ایک لطیف سا پردہ ہے

عین غنا کی حالت میں یہ بات سمجھ میں آئی تھی

ڈھونڈ انہیں اور پوچھ کہ قلب و روح کا جوگ کہاں کاٹیں

تجھ سے پہلے کچھ لوگوں نے یہ گتھی سلجھائی تھی

قلب کٹورا نور بھرا تھا، روح مسلسل ذکر میں تھی

تب ہی جذبوں کی سچائی سوچوں سے دھلوائی تھی

اس گھر سے تو بن میں جا کر رہ لیتے تو اچھا تھا

جہاں اداسی دوست بنی تھی تنہائی ہمسائی تھی

سجدہِ شکر ادا کر گھر میں برکت اور سکینت ہے

وہ بھی دن تھے جب وحشت تن من دھن میں در آئی تھی

چھوڑ عماد گھرانہ حاصل ہے سو سب کچھ حاصل ہے

پردہ رکھ مت پوچھ کہ گھر کو کس نے آگ لگائی تھی

دوپہر۱۲:۲

۴۱فروری ۳۲۰۲

گھرپر

فراقِ نور نے تڑپا دیے ہیں قالب و قلب

اندھیری رات نے بھٹکا دیے ہیں قالب و قلب

میں سوچتا تھا یہ چنگار بجھ چکا ہے مگر

تمہاری یاد نے سلگا دیے ہیں قالب و قلب

ابھی تو نور کی بارش سے ان کو دھونا ہے

مجھے لگا تھا کہ چمکا دیے ہیں قالب و قلب

اداس روح کا کچھ مستقل علاج کرو

کوئی دنوں کو تو بہلا دیے ہیں قالب و قلب

کسی جمال نے روشن کئے تھے روح و بدن

کسی ملال نے گہنا دیے ہیں قالب و قلب

یہاں سے آگے کوئی سخت معرکہ ہے عماد

کوئی تو بات ہے گھبرا دیے ہیں قالب و قلب

دوپہر۰۱:۳

۵۱ فروری ۳۲۰۲

گھرپر

فکر کا روح کے احصار سے رشتہ کیا ہے

علم کا قلب کے اسرار سے رشتہ کیا ہے

یہ نہیں بات کہ غم خوار سے رشتہ کیا ہے

دل کے احساس کا اظہار سے رشتہ کیا ہے

جان افکار کا کردار سے رشتہ کیا ہے

اور کردار کا اقدار سے رشتہ کیا ہے

وقت کے آگے کو چلتے ہوئے اس پہیے کا

دور گزرے ہوئے ادوار سے رشتہ کیا ہے

مادہ و نور کی نسبت کو پرکھنے والے

یہ سمجھ قلب کا اذکار سے رشتہ کیا ہے

یہ بتائیے کہ بھلا علمِ ریاضی کے سوا

آپ کا نور کی رفتار سے رشتہ کیا ہے

یہ تو واعظ ہی بتائیں گے مجھے کیا معلوم

علم کا صاحبِ دربار سے رشتہ کیا ہے

رنج بھی دیتے ہیں، دلجوئی بھی کر لیتے ہیں

آپ کا آپ کے بیمار سے رشتہ کیا ہے

دائرہ ہوں مرا مرکز بھی بہت واضح ہے

اب بس اتنا ہے کہ پرکار سے رشتہ کیا ہے

آنکھ سے دیکھنے والے تجھے معلوم نہیں

قلب کا نور کے دیدار سے رشتہ کیا ہے

کاغذی نوٹ کو دولت نہیں کہہ سکتے ہیں

یہ سمجھ درہم و دینار سے رشتہ کیا ہے

ماہ و سال اتنے گزارے ہیں خرابوں میں عماد

سوچتا ہوں مرا گھر بار سے رشتہ کیا ہے

شام۰۵:۵

۸۱ فروری ۳۲۰۲

گھرپر

 خامشی زندگی کا حاصل اور زندگی درد کی مقلد ہے

وہ جو اک بات ہے بتانے کی وہ بھی بس ذات میں مقید ہے

ساری دنیا کے سامنے ہم نے سوچ بس طاقچوں میں رکھ دی تھی

اب تمہیں بھی نہیں بتا سکتے یعنی احساس بھی مردد ہے

ماخذِ زندگی کو در در پر ڈھونڈتے ہی رہو گے کیا تا عمر

ذات کا بھی تو ایک محور ہے، قلب میں بھی تو ایک معبد ہے

رات پھیلی ہوئی تھی قرنوں سے، ذات بھٹکی ہوئی تھی صدیوں سے

ہر طرف تیرگی تھی جب یہ کھلا، ذات میں بھی کوئی مجدد ہے

دیرپائی کی خواہشات ہمیں بے وجہ رنج میں نہیں رکھتیں

زندگی موت عارضی حالات، اصل میں آدمی مخلد ہے

ہم تو دو چار روز کے اندر درد کی آنچ سے سلگ اٹھے

آپ نے کیسے سہہ لیے یہ غم، آپ کا روگ تو مشدد ہے

آپ تعریف کر رہے ہیں تو آپ کا شکریہ مگر اے دوست

دل مرا ہے تو خیر پتھر ہی اب زمرد ہے یا زبرجد ہے

درد کو دھیمی آنچ کے اوپر سال ہا سال رکھ کے چھوڑ دیا

یہ غمِ عاشقی کی سنت ہے اور سنت بھی جو موکد ہے

ہم نے دیکھاہے لوگ لوگوں سے مل کے روتے ہیں بین کرتے ہیں

دردِ ہستی عماد کس سے کہیں، قلب کا روگ ہی مجرد ہے

شام ۹۴:۴

۰۲ فروری ۳۲۰۲

گھرپر

وقت کے دھارے میں بہتے جا رہے ہیں آپ ہم

دہر کی چکی میں پستے جا رہے ہیں آپ ہم

روز و شب کا امتحاں دینا ہے ماہ و سال تک

سانس کی یہ پھانس سہتے جا رہے ہیں آپ ہم

ماہتاب و شمس کی تشبیہ کا حاصل سنیں

چاند سورج ہیں سو ڈھلتے جا رہے ہیں آپ ہم

جو زمانے کو بتانا تھا، جتانا تھا کبھی

خود کو خاموشی سے کہتے جا رہے ہیں آپ ہم

شام ہوتے ہی گریباں چاک کر لیتے ہیں لوگ

اور اپنے زخم سیتے جا رہے ہیں آپ ہم

دوستی ناتے عداوت کیا بچا ہے اب عماد

رابطوں رشتوں سے تھکتے جا رہے ہیں آپ ہم

سہ پہر۸۵:۳

۴۲ فروری ۳۲۰۲

گھر

بہت افسوس سے کہنا پڑا ہے

جنوں کو با خرد رہنا پڑا ہے

بکی ہے باپ کی دستار بٹیا

تو خالی ہاتھ میں گہنا پڑا ہے

تمہارے ہاتھ پانی سے جلے ہیں

ہمیں بھی آگ میں بہنا پڑا ہے

بدن تو لذتوں میں گم رہا تھا

مگر جو قلب کو سہنا پڑا ہے

عماد اندر کی آزادی کی خاطر

مقید ذات میں رہنا پڑا ہے

صبح ۳۲:۹

۲ اپریل ۳۲۰۲

گھرپر

خارج میں تذکیر سے استنباط ملے

باطن میں تطہیر سے ہی مرآت ملے

درد سے آگے ایک پڑاؤ غم کا ہے

دن پورا کرنے والوں کو رات ملے

ایک وظیفہ روز اکٹھے پڑھنا ہے

پہلے قلب ملانے ہیں سو بات ملے

بات ملانا نکتہ ہے آغاز کا بس

ذکر کی محفل عام کریں تو ذات ملے

ذات ملے کچھ لوگوں کی تو کام کریں

ایک دہائی کاٹ کے یہ حالات ملے

کچھ لوگوں کا ساتھ ہے اور اک مقصد ہے

دیکھیں آگے جیت ملے یا مات ملے

تھک جاتے ہو، پھر ہمت کر لیتے ہو

پھر سے عماد امید بھرے خدشات ملے

صبحِ صادق۵۳:۵

۸۲ اپریل ۳۲۰۲

گھرپر

قطعہ

مسجد و محرابِ ہستی کیا ہوئے

ماہ و سالِ جوش و مستی کیا ہوئے

صاحبانِ کوچہِ نام و نمود

ساکنانِ شہرِ پستی کیا ہوئے

صبح۴۱:۶

یکم مئی ۳۲۰۲

گھرپر

تخیل کے سمندر سے حقیقت کے سرابوں تک

گزر کر آ گئے آخر تحجر کے عذابوں تک

یہ خار آلود رستے، پاؤں کے چھالے ہمیں دے کر

تم اپنی سوچ کو مرکوز رکھنا بس گلابوں تک

کبھی ٹوٹے ہوئے لوگوں کی آنکھوں کو پڑھا تم نے

یا اپنے علم کو محدود رکھا ہے کتابوں تک

حسابِ عمر ہم نے حشر پر ہی چھوڑ رکھا ہے

اٹھا رکھا ہے تم نے حشر کیوں سارے حسابوں تک

گناہِ اولیں، انسان اور ابلیس کی محفل

ملاپِ نفس و شر لایا سحابوں تک، عتابوں تک

ہو اک تو آرزوئے طہر، پھر دل بھی جنوں پیشہ

نہیں رکتی کہانی پھر گناہوں تک، ثوابوں تک

بدن، جذبات، سوچیں، روح کس ماخذ کی پیاسی ہیں

پہنچنا چاہتی ہے ذات آخر کن حجابوں تک

تمہاری جستجو اب بھی تمہیں جینے نہیں دیتی

عماد احمد پلٹ کر آگئے پھر سے خرابوں تک

صبحِ صادق۴۳:۴

۲ مئی ۳۲۰۲

گھرپر

دل و دماغ ٹھکانے پہ آ گئے کہ نہیں

قلوب راز نبھانے پہ آ گئے کہ نہیں

قدم قدم پہ چھلکتے ہوئے ظروفِ مسی

حروفِ رمز چھپانے پہ آ گئے کہ نہیں

رموزِ شہرِ ولایت، علائمِ شبِ غم

جو جانتے ہیں بہانے پہ آ گئے کہ نہیں

قلوب آج کہیں مرتکز نظر آئے

نفوس آج نشانے پہ آ گئے کہ نہیں

بلا و درد کے عاشق، شبِ عروس کے بعد

غمِ حیات بتانے پہ آ گئے کہ نہیں

کہو کہ رات گئے مے کشوں کی محفل میں

فقیہِ شہر بلانے پہ آ گئے کہ نہیں

شعورِ ذات کی منزل کا سنگِ میل ہے یہ

عماد خود کو بھلانے پہ آ گئے کہ نہیں

رات ۸۲:۲۱

۸ مئی ۳۲۰۲

گھرپر

تہذیبِ غم سکھائے نہیں سیکھتا کوئی

تنزیلِ درد کو بھی نہیں جانتا کوئی

ترتیلِ دردِ عشقِ مجازی کے رعب میں

حق کو نظر اٹھا کے نہیں دیکھتا کوئی

تقلید جس نظام کی بنیاد ہو وہاں

تحقیق کا محاذ نہیں کھولتا کوئی

احساس ہو رہا ہو جدائی کا ذات سے

ایسے میں جذب و ضبط نہیں باندھتا کوئی

گر انگلیاں قلم ہوں سیاہی ہو خون کی

پھر حرف کا وفور نہیں روکتا کوئی

ہر شخص کو کرامت و اعجاز چاہیے

اس شہر میں شعور نہیں مانگتا کوئی

لوگوں کو سچ بتا کے پلٹ آؤ تم عماد

اب سر چڑھے تو بات نہیں مانتا کوئی

صبح ۷۲:۹

۸مئی ۳۲۰۲

گھرپر

اعجازِ غم ہے حکمتِ قلب و شعورِ ذات

کھلنے پہ آ گیا ہے تمہارا وفورِ ذات

یہ خود کو مارنے پہ عطا میں ملا ہمیں

تم جس کو کہہ رہے ہو ہمارا ظہورِ ذات

اوروں کے قلب و روح کی گہرائی چھوڑیے

پہلے گزر کے دیکھئے سارے بحورِ ذات

پاکیزگیِ جسم سے آگے بھی دیکھیے

کوشش کریں کہ پا سکیں تھوڑا طہورِ ذات

قلب آگہی کے ایک سمندر میں گھر گیا

کشتی بچائی پھینک کے اپنا غرورِ ذات

پایا ہے اک قرن میں حقیقت کا ایک پل

اترا ہے ایک عمر میں اپنا فتورِ ذات

دھونا پڑے گا نور سے دیوارِ قلب کو

اب طہر سے مٹے گا ہمارا فجورِ ذات

ماری ہیں اپنی ذات میں سو خواہشیں عماد

پر ذات بچ گئی ہے یہی ہے قصورِ ذات

جب نفس مٹ گیا ہے، فقط قلب رہ گیا

پایا ہے تب عماد ذرا سا سرورِ ذات

شام ۶۱:۴

۸ مئی ۳۲۰۲

گھرپر

نفسِ ابلیس

پہلے پہل تو صرف اقامت کی بات کی

پھر بیسیوں برس کی ریاضت کی بات کی

اپنا مقام خوب جتایا بڑھا چڑھا

جادو نہیں چلا تو کرامت کی بات کی

خواہش بڑھی تو ذکر گنائے تمام تر

اپنی عبادتوں کی طوالت کی بات کی

مخلوق کی بھلائی کا دعویٰ کیا گیا

سودا بڑھا تو عمرِ سخاوت کی بات کی

اپنے ہر اک چلن کا حوالہ دیا گیا

اپنے ہر اک عمل کی قدامت کی بات کی

پہلے پہل جتایا گناہوں سے اجتناب

پھر اپنی نیکیوں کی ضخامت کی بات کی

اپنا مقام و رتبہ بتانے کے بعد کچھ

اوروں کے فکر و دل کی خیانت کی بات کی

ماضی کی بے تحاشا مناجات کے عوض

فردا میں پرشکوہ نظامت کی بات کی

جب خواہشاتِ نفس کو سردار کر لیا

تو دل ہی دل میں اپنی امامت کی بات کی

انسانیت کا فخر مٹانے کو آخرش

ابلیس بن کے حقِ نیابت کی بات کی

شام۸۰:۸

۰۱ مئی ۳۲۰۲

گھرپر

عمر کا سورج نصف نہار سے آگے نکلا تو یہ جانا

کتنا لا حاصل ہے بند مٹھی سے گرتی ریت بچانا

جانے والے جا سکتے ہیں، رکنے والے رک سکتے ہیں

سب کچھ کر کے دیکھ لیا ہے، کیا بتلانا، کیا سمجھانا

عمر کا نوحہ لکھا ہے تو پڑھ لینے دو ہم لوگوں کو

غم کے مارے سنگی ساتھی ہیں اب ہم سے کیا شرمانا

ذہنی کاوش سے گھر بار چلا لیتے ہو، خوش قسمت ہو

ان سے پوچھو جو دیتے ہیں اپنی سوچوں کا ہرجانہ

دنیا، ہستی، عمر، غنیمت، خوشیاں، غم، آسائش، روٹی

جذبوں کی یہ گہما گہمی، سوچوں کا یہ تانا بانا

کیسا روگ لئے پھرتے ہو، کیونکر جوگ لئے پھرتے ہو

چھوڑو لا حاصل کی خاطر حاصل کو کیوں آگ لگانا

قلب کی حدت قالب کے کوئلے کو ہیرا کر دیتی ہے

دھیمی آنچ پہ رکھے رکھو درد کا یہ انمول خزانہ

لوگ عماد احمد محور تک آ جاتے ہیں گرتے پڑتے

لیکن کتنوں نے سیکھا ہے محور پر پرکار گھمانا

رات ۱۳:۱۱

۰۱ مئی۳۲۰۲

گھرپر

خالی بازو ہی لہرا دو

لفظ کی حرمت پر پہرہ دو

حرف نہ آئے بے جگری پر

زخم دیا ہے تو گہرا دو

آنسو گھاٹ سے دھل کر نکلا

سلوٹ سے عاری چہرہ دو

ساتھ کا نخلستان نہیں تو

اجڑی یادوں کا صحرا دو

توڑ کے اپنا آپ عماد اب

خود کو ہی اس کا سہرا دو

رات ۶۴:۱۱

۰۱ مئی۳۲۰۲

گھرپر

لَو (۱)

عمر کی ایک دہائی گویا درد کے نام ہوئی

ایک خزاں میں جھڑتے اک اک فرد کے نام ہوئی

ایک جوانی اور ہوائے سرد کے نام ہوئی

ایک جنونِ جان فشاں کی گرد کے نام ہوئی

ایک دہائی عمر کی بہتی نو کے نام کریں

دل میں لگی، دہلیز پہ جلتی لو کے نام کریں

رات ۰۵:۳

۱۱مئی۳۲۰۲

گھرپر

قطعہ

جنوں کی پردہ دری سے سیکھا، خرد کی بخیہ گری سے سیکھا

نیاز مندی سے فیض پایا، سفر سے، آوارگی سے سیکھا

بہت کتابیں پڑھیں پڑھائیں، بڑے سیانوں کے پاس بیٹھے

بہت سے دور آئے زندگی میں مگر جو قلبِ جلی سے سیکھا

رات ۱۵:۱

۹۱مئی ۳۲۰۲

گھرپر

گفتگو کی لَو جلتی ہے، بات خودبخود چلتی ہے

دوستوں میں بیٹھے ہوں تو رات بے طرح ڈھلتی ہے

وقت تو دبے پاؤں ہی پاس سے کھسک جاتا ہے

بات تب سمجھ آتی ہے عمر ہاتھ کیوں ملتی ہے

مسکرا رہے ہیں اب بھی رنگ و روپ سے پر چہرے

ہم ہی ڈھل رہے ہیں شاید زندگی نہیں ڈھلتی ہے

تیرگی کے ان رستوں پر عمر کاٹ دی ہے ہم نے

قلب کی نہاں خانوں میں اب بھی ایک لو جلتی ہے

نفس کی ہر اک خواہش کو باندھ کر جیا جاتا ہے

اس کا پیٹ بھر دینے سے یہ بلا کہاں ٹلتی ہے

ذوق و شوق اونچا ہے تو حوصلہ بڑھانا ہو گا

جستجو میں دم کم ہو تو آرزو نہیں پلتی ہے

یاد ہے خوشی بھی اپنے گھر میں راج سے رہتی تھی

اب تو اس کی غم کے آگے دال ہی نہیں گلتی ہے

آج بھی عماد احمد گر تھک کے بیٹھ جاتا ہوں تو

آرزو سرہانے آ کر مجھ کو پنکھیاں جھلتی ہے

رات ۳۵:۲

۹۱ مئی ۳۲۰۲

گھرپر

َؒلَو(۲)

لو لگائے ہوئے

لو جلائے ہوئے

دن گزرتے رہے

عمر کٹتی رہی

اپنے اللہ سے لو لگائے ہوئے

ایک امکان کی، ایک امید کی

روشنی اپنے سینے کے اندر مسلسل جلائے ہوئے

ایک خواہش کو من میں بسائے ہوئے

اک تمنا کو دل میں چھپائے ہوئے

دن گزرتے رہے

عمر کٹتی رہی

جسم و جاں کے سحر سے نکلتے ہوئے

ماخذِ روح کو آزمائے ہوئے

ضبط و امید اور تزکیے کے لئے

اپنا گھر چھوڑ کر، بام و در چھوڑ کر

اپنی بستی، محلہ،نگر چھوڑ کر

شہرِ دل میں بسی وہ نظر چھوڑ کر

جا بجا پھیلتے راستوں میں سے ہر

راستہ چھوڑ کر

حال و ماضی کا ہر سلسلہ چھوڑ کر

اپنے علم و ہنر سے نچوڑا ہوا

ہر اثر توڑ کر

قلب کی منزلوں کے تعاقب میں اپنے ہی اندر

مسلسل اترتے ہوئے

اپنے قالب کو رستہ بنائے ہوئے

دن گزر تے رہے

عمر کٹتی رہی

پہلے پہلے تو بس صرف اپنے لئے

پھر شعورِ ملاپِ جنون و خرد پا لیا تو سبھی دوسروں کے لئے

اپنے اندر سے اٹھتی ہوئی روشنی

اور خوشبو کو بادِ صبا میں ملائے، بسائے ہوئے

اپنی سانسوں کا جھونکا بنائے ہوئے

دن گزرتے رہے

عمر کٹتی رہی

رفتہ رفتہ قرارِ حقیقت ملا

دھیرے دھیرے مقامِ عنایت ملا

اپنے اندر یہ اعجاز پائے ہوئے

راستوں میں سے اک راستہ چن لیا

سب مسافت ختم کر کے بیٹھے رہے

اپنی ہستی کو دیپک بنائے ہوئے

دوسروں کو مسافت کی تکلیف سے

اور بھٹکنے سے یکسر بچائے ہوئے

اپنے قلب و نظر کو

اندھیرے میں روشن دیا کر کے ہر دم جلائے ہوئے

دن گزرتے رہے

عمر کٹتی رہی

لو لگائے ہوئے

لو جلائے ہوئے

دوپہر ۰۳:۲۱

۹۱ مئی۳۲۰۲

گھرپر

آرزو انتظار کرتی ہے

جستجو اعتبار کرتی ہے

تیز آندھی میں اڑ گیا تھا میں

میری ہستی غبار کرتی ہے

ذات میں قید چند یادوں کو

بے خودی خود فرار کرتی ہے

کیوں نہ ہونٹوں سے چھو لیا جائے

تشنگی مجھ سے پیار کرتی ہے

سب خرد مندیوں سے تھک کر ذات

اب جنوں اختیار کرتی ہے

دم بہ دم ڈوبتی ہوئی یہ رات

بے وجہ بے قرار کرتی ہے

یاد کا گھونٹ گھونٹ پیتا ہوں

اور تمنا خمار کرتی ہے

روز لیتی ہے سانس کی قیمت

زندگی کب ادھار کرتی ہے

یہ ٹھٹھرتی ہوئی اکیلی شب

میرے دل میں شرار کرتی ہے

نفس کے جنگلوں میں میری ذات

رات دن کیا شکار کرتی ہے

غم جلاتا ہے آگہی کی لو

یہ خوشی کیا نثار کرتی ہے

روشنی کے سفر پہ نکلی ذات

تیرگی سے کنار کرتی ہے

غم سے بھرپور زندگی بھی عماد

چین کے پل شمار کرتی ہے

دوپہر ۷۳:۲۱

۷۲مئی ۳۲۰۲

گھرپر

اجماعِ کُل حواس ہے غم کے مقام پر

کربِ شعورِ ذات پہ، دکھ کے قیام پر

قلب و نظر نے عقل و خرد سے گلہ کیا

کیونکر نہیں بضد ہوئے سب انضمام پر

اے دل ترے سے ہٹ کے کئی فیصلے کئے

آئے نہ کوئی حرف ترے احترام پر

خواہش کے راستوں پہ چلو گے تو عمر بھر

بھٹکے پھرو گے تم بھی مشیت کے نام پر

جو راستہ چنیں گے چنیں گے یقیں کے ساتھ

اتنا یقین ہے ہمیں قلبی نظام پر

یہ ترکِ چاہِ نفس کی تکلیف ہے عماد

ہم خود سے لڑ رہے ہیں کسی انتظام پر

رات ۶۳:۹

۷۲ مئی ۳۲۰۲

گھرپر

تطہیرِ بدن تزکیہِ ذات سے پہلے

اور سوچ کی تدبیر ہو جذبات سے پہلے

قالب تو اندھیرے میں بھٹک جائے گا ایسے

روشن کرو یہ قلب گھنی رات سے پہلے

ہاں صبر کے کچھ سال بھی آئے تھے کہ سیکھیں

خاموشی کی تہذیب کسی بات سے پہلے

ان لوگوں کے بارے میں یہ رائے نہیں رکھیے

ایسے نہیں دکھتے تھے یہ صدمات سے پہلے

گزرے ہوئے برسوں سے یہ آنکھیں نہیں سوکھیں

اس سال تو بہہ جائیں گے برسات سے پہلے

انفاق نے کھولا ہے مرا سینہ وگرنہ

جو قلب کا افلاس تھا خیرات سے پہلے

میں نے تو عماد اپنا وتیرہ یہی رکھا

تھوڑا سا عمل علم کی افراط سے پہلے

دوپہر ۶۳:۱

۸۲ مئی۳۲۰۲

گھرپر

دل و دماغ کو گر بے لگام چھوڑ دیا

مکاتبت کے بنا ہی غلام چھوڑ دیا

کسی نے فقر میں اونچا مقام چھوڑ دیا

کسی نے قلب کو سمجھا تو جام چھوڑ دیا

کسی نے عمر گزاری بچا کے دامن و دل

کسی نے دجل کا پورا نظام چھوڑ دیا

کسی کو درد کی تحریک نے جلا بخشی

کسی نے سوگ میں ہر انتظام چھوڑ دیا

خیال یہ تھا کہ میراثِ درد چلتی رہے

سو اپنے بعد کے لوگوں میں نام چھوڑ دیا

تم اپنی روح فروشی سے گھن نہیں کھاتے

برے بروں نے بھی اتنا تو کام چھوڑ دیا

ہنوز لذتِ کام و دہن نہیں چھٹتی

ابھی کہاں سے منام و کلام چھوڑ دیا

بقا کے راز کو ہم نے فنا کے پاس سنا

خلود پانے کی خاطر دوام چھوڑ دیا

عداوتوں کے گھنے جنگلوں میں کھو گئے لوگ

محبتوں کا سفر ناتمام چھوڑ دیا

عماد ہجرتِ قلب و نظر کے درد کے بعد

دماغ و دل نے غمِ انصرام چھوڑ دیا

شام ۹۳:۵

یکم جون ۳۲۰۲

گھرپر

بعد ازخرابیِ بسیار

ایک آنسو جو آنکھوں سے ٹپکا نہیں

ایک نوحہ جو سینے سے نکلا نہیں

ایک لمحہ جو برسوں سے گزرا نہیں

ایک صدمہ جو قرنوں سے بھولا نہیں

قلب میں آگ ہے، سوچ میں جوگ ہے

دل میں اک سوگ ہے، جذب کا بھوگ ہے

راستے راستوں سے ملے، کٹ گئے

لوگ بڑھ بڑھ کے آگے ہوئے، ہٹ گئے

جو کبھی ایک تھے، سب کے سب بٹ گئے

بال بھی اب تو مٹی تلے اٹ گئے

سوچ تھمتی نہیں، دل بہلتا نہیں

سوگ رکتا نہیں، بھوگ چھٹتا نہیں

کیا بتائیں کہ کس کس سے کٹ آئے ہیں

سوگ اور جوگ میں یوں گھسٹ آئے ہیں

قلب و جان و جگر سے نمٹ آئے ہیں

یعنی اپنے ہی اندر سمٹ آئے ہیں

قلب میں آگ کیا، سوچ میں جوگ کیا

دل میں اب سوگ کیا، جذب کا بھوگ کیا

کوئی آنسو نہیں جو ٹپک پائے اب

کوئی نوحہ نہیں کرب دے جائے اب

کوئی لمحہ نہیں پھیلتا ہائے اب

کوئی صدمہ نہیں جو ہمیں کھائے اب

دوپہر۲۵:۱

۲۱ جون ۳۲۰۲

گھرپر

خیال چل پڑا ہے ایک راستے پہ، کیا کہیں

نظر اٹھی ہوئی ہے ایک زاویے پہ، کیا کہیں

جنوں خرد کے نام پر بہت سے غم اٹھا لئے

اب آگئے ہیں بے خودی کے سلسلے پہ، کیا کہیں

دل و نظر کی بات تھی دماغ تک پہنچ گئی

شعور و بے خودی کے اس معاشقے پہ کیا کہیں

نظر کا التفات تھا، جنون کا ثبات تھا

پھر اس کے بعد شہرِ دل کے واقعے پہ کیا کہیں

جو رو دیے تھے صرف اپنی بات کی شکست پر

وہ اپنی ذات ٹوٹنے کے سانحے پہ کیا کہیں

جو چار دن کی بات ہو تو راستے بدل بھی لیں

عماد ساری عمر کے مغالطے پہ کیا کہیں

سہ پہر۳۱:۴

۱۳ جولائی۳۲۰۲

گھرپر

 کواڑ کیا، یہاں تو جسم و جاں کا در اکھڑ گیا

پہ قلب کی مزاحمت سے زورِ شر اکھڑ گیا

مری جڑیں زمین میں اتر گئیں، بکھر گئیں

تبھی تو میں کھڑا رہا اگرچہ سر اکھڑ گیا

شعور و بے خودی ادھیڑتے اکھیڑتے رہے

جب اپنا سامنا کیا تو آج ڈر اکھڑ گیا

خرد کی بارشوں میں غم کی چھت شعور پر گری

جنوں کے زلزلوں سے آرزو کا گھر اکھڑ گیا

مجھے لگا شکستِ ذات جھیل جائے گا یہ دل

غموں میں بھی کھڑا رہوں گا میں، مگر اکھڑ گیا

یہ آخری کمین گاہِ آرزوئے راز ہے

نہیں بچے گی جستجو یہ قلب گر اکھڑ گیا

عماد غم کی رات میں جنوں کی آندھیاں چلیں

سنا ہے شہرِ ذات میں کوئی شجر اکھڑ گیا

رات ۱۱:۱۱

۱۳ جولائی ۳۲۰۲

گھرپر

شعورِ ہستی نے کس اداسی میں کیسے دکھ میں جنم لیا تھا

غموں کی گودوں میں آنکھ کھولی تھی اور تنہائی میں پلا تھا

جنوں مرا مسئلہ نہیں ہے، غموں کا بھی سلسلہ نہیں ہے

مگر جو سوچوں میں چل رہا تھا، مگر جو ادراک بڑھ رہا تھا

مجھے کبھی وسوسوں نے گھیرا نہ دل نے بے چینیاں دکھائیں

اداس لمحوں سے فیض پانا تمہیں لگا ایک حادثہ تھا

یہ کہکشاؤں میں گم معارج تو میری ہستی میں کھل رہے تھے

جو آسمانوں میں جا کھلا تھا وہ میرے اندر کا راستہ تھا

دل و جگر جب قرینِ غم تھے تو آرزو کا سراغ پایا

عمیق لمحوں کی صحبتوں سے ہی جستجو کا پتا ملا تھا

جب ایک مدت کے بعد واپس پلٹ کے آئے تو ہم نے دیکھا

سبھی مسافر گزر گئے تھے، عماد رستہ وہیں کھڑا تھا

صبح ۰۳:۵

۲ اگست ۳۲۰۲

گھرپر

اللہ کرے کہ قلب کی کھڑکی کھلی رہے

ذہن و نظر میں روشنی یوں ہی بسی رہے

 بڑھتے رہیں شعور بھی اور بے خودی بھی یوں

میرے وجود و قلب میں ہم شیرگی رہے

ماضی سے جو ملا ہے وہ اعجاز بن سکے

فردا میں قلب و روح کی آسودگی رہے

نورِ خدا سے ایسے لگائی ہوئی ہو لو

ہر پور پور روشنی، خوشبو بنی رہے

بیٹھا رہوں جلا کے میں نورِ ازل کی لو

دنیا خدا کے نور سے روشن ہوئی رہے

دوپہر ۰۱:۲۱

۰۱ اگست ۳۲۰۲

گھرپر

شمعِ غم جل رہی ہے جلائے رکھو

زندگی چل رہی ہے چلائے رکھو

یہ فراق اب رگوں میں اتر جائے گا

بھول جانے کو اب تم بھلائے رکھو

میرے خوابوں میں بھی رتجگے ہیں میاں

اب جگائے رکھو یا سلائے رکھو

اور دو چار دن حوصلہ ہو رہے

جستجو آرزو میں ملائے رکھو

قلب کو تشنگی کا بہت خوف ہے

جامِ امید اس کو پلائے رکھو

خونِ دل سے نہیں کر سکے غسلِ جاں

آنسوؤں سے ہی چہرہ دھلائے رکھو

قلب کی پیاس کیا، قلب کی بھوک کیا

غم پلائے رکھو، دکھ کھلائے رکھو

جسم و جاں تھک رہے ہیں عماد آج کل

تھوڑی امید ان کو دلائے رکھو

شام ۷۰:۴

۵۱ اگست ۳۲۰۲

گھرپر

اپنے اوپر حصار مانگتا ہے

بے وجہ دل قرار مانگتا ہے

پہلے اس کو حصول چاہئے تھا

اور اب انتظار مانگتا ہے

اتنی ترتیب سے الجھتا ہوں

قلب کچھ انتشار مانگتا ہے

قلب کہتا ہے بے کرانی ہو

ذہن کیوں اختصار مانگتا ہے

بے وقوفی کی بات کرتا ہے

آرزو کا شمار مانگتا ہے

جس کو منجھدار سے محبت ہو

پھر کہاں وہ کنار مانگتا ہے

مانگتا ہے جنوں میں پردہ دری

اور پھر بار بار مانگتا ہے

جستجو میں تھکا ہوا یہ دل

آرزو کا غبار مانگتا ہے

بس اجازت ہو ایک کاوش کی

دل کہاں اعتبار مانگتا ہے

دلدلوں میں چلا ہوا یہ جسم

پیر کے نیچے خار مانگتا ہے

کیا حماقت ہے یہ عماد احمد

ذات پر اختیار مانگتا ہے

شام ۷۲:۴

۵۱ اگست ۳۲۰۲

گھرپر

وفورِ جذبات میں جنوں نے خرد سے کیا مستعار مانگا

بقا کی منزل کی سمت پوچھی کہ جوہرِ انتظار مانگا

فنا کے رستوں پہ چلنے والے رموزِ تسلیم جانتے ہیں

کبھی نہیں آرزو بتائی، کبھی نہیں اختیار مانگا

سمجھ گئے جب کہ نفسِ آدم کا امتحاں اس کی ذات میں ہے

صدائے کن میں سکون چاہا، رضائے حق میں قرار مانگا

قلوب برفاب ہو چکے تھے، دماغ جیسے کے سرد خانے

تبھی تو کچھ سرپھروں نے ضد میں جنوں کا جلتا شرار مانگا

بدن میں جب خوف بھر گیا تو چہار قل سے امان پائی

نقب لگا شر کا قلب پر جب تو نورِ حق کا حصار مانگا

وفا کے رستے پہ چلنے والے سبھی مسافر گزر گئے ہیں

کسی نے گردن ہی ہار دی ہے، کسی نے گردن میں ہار مانگا

جو زندگی کی دکاں پہ آیا ہے اب وہ قیمت ادا کرے گا

کسی نے چاہا کہ نقد لے لوں، کسی نے سودا ادھار مانگا

خیال کیا، احتمال کیا ہے، یقین و شک کا سوال کیا ہے

عماد کس نے تمہاری سوچوں کے زاویوں کا شمار مانگا

رات ۲۵:۰۱

۱۲ اگست ۳۲۰۲

گھرپر

میں عدم سے وجود میں آیا

پھر بدن کی حدود میں آیا

قلب نکلا دہر کے چنگل سے

قید چھوٹی، قیود میں آیا

کرب تسلیم و ضبط سے پایا

اور سکوں بھی سجود میں آیا

مشرق و مغرب و شمال و جنوب

سب چھٹے دل عمود میں آیا

عمر بھر کی ریاضتوں کا صلہ

ایک عام الوفود میں آیا

نفس کی بدلیاں چھٹیں تو قلب

پھر سپہرِ کبود میں آیا

ترکِ دنیا بھی ترک کر ڈالا

یعنی باطن نمود میں آیا

اس طبیعت میں انکسار عماد

زاہدوں کے جنود میں آیا

رات ۸۵:۲۱

گھرپر

در و دیوار سے وحشت، شبیہِ یار سے وحشت

جنوں سے، عقل سے، تہذیب سے، اقدار سے وحشت

تری شعلہ بیانی کی اسیری میں رہے قرنوں

مگر ہونے لگی ہے اب تری گفتار سے وحشت

کبھی ہم بھی کسی کی نرم گفتاری کے قائل تھے

پر اب محسوس ہوتی ہے اسی کردار سے وحشت

غمِ جاناں، غمِ ہجراں، غمِ دوراں، غمِ ہستی

ہمیں ہوتی رہی ہے عمر کے ادوار سے وحشت

عماد احمد اب اس بستی میں ہر چہرے سے ظاہر ہے

تری یادوں سے اکتاہٹ، ترے دیدار سے وحشت

شام ۲۱:۵

۸ نومبر ۳۲۰۲

گھرپر

اگر ہم عاجزی کو زیست کی معراج کہتے ہیں

تو سالوں ذات کے صحرا میں پھر کر آج کہتے ہیں

جو اپنے آپ کو ڈھوتا رہے مزدور ہوتا ہے

کرے جو ذات کی تعمیر اس کو راج کہتے ہیں

جنوں کے دور میں بخیہ گری کا فن نہیں چھوڑا

ہمیں اس شہر میں کچھ اہل دل نساج کہتے ہیں

جنوں والوں نے دشت و کوہ میں رستے نکالے تھے

انہی راہوں کو اب اہلِ خرد منہاج کہتے ہیں

ہماری آنکھ سے ٹپکا ہے برسوں بعد اک آنسو

اسی سیلِ بلا کو درد کا اخراج کہتے ہیں

تو تم نے آج تک میرے قریں اک غم نہیں دیکھا

نہیں دیکھو گے آئندہ بھی، اس کو لاج کہتے ہیں

شعور و آگہی کی ایک قیمت ہے عماد احمد

جسے تم بوجھ کہتے ہو اسے ہم تاج کہتے ہیں

دوپہر ۱۴:۲۱

۸ نومبر ۳۲۰۲

گھرپر

غمِ ہستی کی حرمت کا اگر ادراک ہو جاتا

تو قلب و روح، جسم و جان سب کچھ پاک ہو جاتا

یہ خاک و خوں کا خاکستر لیے پھرنے سے بہتر تھا

میں خود کو نور کر لینے کی خاطر خاک ہو جاتا

خرد کے ماہ و سال ایسی زبوں حالی سے بچ جاتے

اگر جوشِ جنوں میں چار دن بیباک ہو جاتا

کبھی اندر خلا بڑھنے لگے تو سوچ آتی ہے

غبارِ نفس ہونے سے خس و خاشاک ہو جاتا

ذرا بھی زعم ہو جاتا اگر اپنی طہارت کا

عماد احمد تمہارا قلب ہی ناپاک ہو جاتا

صبح ۵۵:۸

۰۲ نومبر ۳۲۰۲

گھرپر

وفورِ نور کی اک جو کا انتظار رہا

ہمارے قلب کو اک ہو کا انتظار رہا

بدن اداس ہوا پھر شکست مان گیا

اگرچہ روح کو خوشبو کا انتظار رہا

بہت سنی تھی فراقی کے ماہ و سال میں بات

شبِ وصال میں جادو کا انتظار رہا

شدید دھوپ میں سایہ تلاش کرتے رہے

اندھیری رات میں جگنو کا انتظار رہا

مہیب ذات کے جنگل میں بھیڑیے ہی ملے

ہمیش قلب کے آہو کا انتظار رہا

کوئی تو سیلِ غمِ زندگی میں ڈوب گیا

کسی کی آنکھ کو آنسو کا انتظار رہا

تکلفات کا ایسا حجاب قلب میں تھا

عماد آپ کو اک تو کا انتظار رہا

صبح ۰۳:۹

۶ دسمبر ۳۲۰۲

گھرپر

سفر کے اندر اٹھی مرے میں خرد سے وحشت، جنوں کی چاہت

وگرنہ گھر میں تو بڑھ رہی تھی بدن کی راحت، سکوں کی چاہت

کسی کی سوچوں کے معترف ہو تو آؤ جذبوں کے در بھی کھولو

عقیدتوں سے بھی ماورا ہے محبتوں کے فسوں کی چاہت

ہزار ہا سال ہو گئے ہیں بشر بشر سے نبرد میں ہے

فنا ہوں کیسے بقا کی جنگیں، مٹے گی کیسے یہ خوں کی چاہت

ہماری ہستی میں رمز برپا ہے اور ہم پا بہ گل کھڑے ہیں

ہمارے اندر عروجِ ہستی، ہمارے اندر زبوں کی چاہت

عماد احمد تمہارے قلب و نظر میں اٹھتے سوال سارے

جواب بن جائیں گے کریدو گے جب کبھی بھی دروں کی چاہت

شام ۵۱:۶

۵۲ دسمبر ۳۲۰۲

ڈیفنس ایچ بلاک مارکیٹ، لاہور

 سیاہ رات مقدر ہے روشنی مقدور

سحر سے پہلے بھی کاوش کریں گے لوگ ضرور

نصیب ہے تو اسے آزما کے دیکھتے ہیں

اگر نہیں ہے تو پھر کاہے بیٹھنا مجبور

کسی کے ساتھ نہ چلنے کا دکھ تو ہے لیکن

میں اپنی ذات کے آگے نہیں ہوا معذور

غرورِ ذات سے آگے، شعورِ قلب کے بعد

غبارِ نفس کے صحرا میں آرزو کا ظہور

عماد لفظ حقیقت نہیں بتا سکتے

خموشیوں میں ہی ہونے دے ذات کا یہ وفور

شام۴۲:۶

۶۲ دسمبر ۳۲۰۲

غازی روڈ، لاہور

سچائی کا تنہائی سے ربط رہا

اکثر سینہ سخت، کلیجہ لخت رہا

صدیوں کے دکھ لمحوں میں محسوس کئے

لمحوں کا غم سالوں دل پر ثبت رہا

دل ٹوٹا، نبضیں ڈوبیں، سانسیں الجھیں

لیکن چہرے اور انکھوں میں ضبط رہا

دنیا کی خوشیوں کے تناظر میں جانچا

پھر پلٹا اور اپنے غم میں مست رہا

اونچے لوگوں کی پستی دیکھی تھی عماد

اچھا تھا اپنی نظروں میں پست رہا

شام۴۳:۵

یکم جنوری۴۲۰۲

بحریہ ٹاوٗن لاہور میں ایک عزیز کے گھر پہ

امکان

زندگی کٹ گئی

آگہی کا سفر دل میں چلتا رہا

وقت کٹتا رہا

اپنی ہستی کا منظر بدلتا رہا

اپنے اندر ہی یوں ہم بدلنے لگے

ساری خوشیاں سبھی غم بدلنے لگے

اپنے قلب و نظر کے حوالوں سے نکلے

 خیالوں کے موسم بدلنے لگے

تو دکھا آرزو کا انوکھا نگر

اس نگر کو جو دیکھا تو خواہش جگی

جس سے کھلنے لگے اور بھی راستے

اور ان سے سفر

آرزو، خواہشیں، راستے اور سفر

اس پہ باطن سے ملتی ہوئی اک خبر

اور ان کا ثمر

جس کے اک بیج سے

ایک پورا شجر

دل میں بڑھتا رہا

اس سے ہستی کا منظر بدلتا رہا

اپنے اندر سے اٹھتے سوالوں کا ڈر

گاہے بڑھتا رہا

گاہے گھٹتا رہا

پھر بہت فاصلوں، راستوں، موسموں اور سالوں نے پرکھا ہمیں

تو وہ دن آ گیا

راستوں سے سوا، بادلوں سے پرے بے نشاں اور بے رنگ رستے جو پہلے کبھی آنکھ کی پتلیوں کی رسائی میں آئے نہ تھے

یوں دکھائی دیے

جیسے روشن دیے

آنکھ میں گھل گئے

آسمانوں کے در قلب پر کھل گئے

اپنی ہستی کے غم جو بہت سال سے داغِ دل بن رہے تھے سبھی ایک دم دھل گئے

اور ان سے پرے

ڈوب کر پھر ابھرتے ہوئے روشنی سے بنے پیکروں کے وہ پر

پردہِ قلب پر جب دکھائی دیے تو حقائق کے کتنے ورق کھل گئے

اور دکھنے لگے اپنی ہستی سے پیچھے کے

پہلے کے غم

کائناتی الم

حال کے خیر و شر سے بہم زیر و بم

اور ہم میں جو ہونے کا امکان ہے

اس کے سارے قدم

اس کو لکھنے کی ساری سیاہی

قلم

اور ہم اور ہم

دوپہر۷۲:۱

۸ جنوری ۴۲۰۲

بہن کے گھر پر، مال روڈ، لاہور

انتہائے ارتقائے آدمِ خاکی تو دیکھ

نور کے پردے کیے ہیں چاک بے باکی تو دیکھ

صاف ستھرے بام و در والے محلوں تک رہو

اپنی تہذیبی روایت کی یہ ناپاکی تو دیکھ

ان گنت رستے ہیں ہر رستے پہ سو سو دام ہیں

جو مشیت پر ہے راضی اس کی چالاکی تو دیکھ

قلب راضی ہے مگر تشکیک کی تسکین کو

نفسِ امارہ گواہی دے گا؟ تو شاکی تو دیکھ

آرزو اور جستجو نے منزلیں پا لیں مگر

دل کی غم ناکی تو دیکھ، آنکھوں کی نم ناکی تو دیکھ

ذات کے گہرے بھنور میں خود کو پھینکا، ہنس دیا

تو عماد احمد کی اپنی جاں پہ سفاکی تو دیکھ

دوپہر ۰۵:۲

۷ فروری ۴۲۰۲

گھرپر